ГӘДОУҬА АРАИОН АХАДАРЕИ ГӘДОУҬА АРАИОН АИЗАРЕИ РЫҞНЫТӘ АДЫРРАҬАРА
86 шықәса дшырҭагылаз лыԥсҭазаара далҵит еицырдыруаз ауаажәларратә - политикатә усзуҩы, шықәсы рацәала Аԥсны жәлар рымаҵ аураҿы зышьаҭа ӷәӷәа нзыжьыз Иулиа Захар-иԥҳа Папба.
Уи лқәыԥшра шықәсқәа зегьы иадҳәалоуп акомҿареидгыла. Дыҟан акомҿареидгыла Гәдоуҭатәи араиком актәи амаӡаныҟәгаҩыс. Абрантәи, лбаҩхатәра азгәаҭаны, диаргоит апартиа Гәдоуҭатәи араиком ахь аусура.
Уа акыр шықәса еихьӡарала аус луан араиком амаӡаныҟәгаҩыс.
Иулиа Захар-иԥҳа Аԥсны жәлар Рџьынџьтәылатә еибашьраан еиҿылзкааз, наԥхгарагьы зылҭоз Аԥсны аҳәса Рхеидкыла Аиааира арааигәатәразы иалшаз рацәоуп, абжьы ҿацала аиаша адунеи иаханарҵәон, ҳаибашьцәа рус ԥшьа иацхраауан.
Иулиа Захар-иԥҳа Папба лааԥсара ажәлари аиҳабыреи рыҟнытә азхаҵара амоуп. Иланашьоуп: Асовет Еидгыла аҟнытә - Аҳаҭыртә Дырга аорден, Аԥсны Аҳәынҭқарра аҟнытә -Ахьӡ Аԥша аорден ахԥатәи аҩаӡара. Убас, ирацәаны Аҳаҭыртә дыргақәеи Аџьшарақәеи.